តម្លៃដីនៅរាជធានីភ្នំពេញកើនឡើងទ្វេដង
តម្លៃដីនៅរាជធានីភ្នំពេញកើនឡើងទ្វេដង
ស្ថិរភាពនយោបាយ កំណើនសេដ្ឋកិច្ច និងលំហូរចូលនៃអ្នកវិនិយោគមកពីក្រៅប្រទេស បានធ្វើឲ្យតម្លៃដីនៅក្នុងខណ្ឌមួយចំនួនរបស់រាជធានីភ្នំពេញហក់ឡើងជិតទ្វេដង បើប្រៀបធៀបមុនពេលពិភពលោកជួបនូវមហាវិបត្តិសេដ្ឋកិច្ច និងហិរញ្ញវត្ថុសកល កាលពីឆ្នាំ ២០០៨។
យោងតាមការសិក្សារបស់ក្រុមហ៊ុន ប៊ុណ្ណា រៀលធី គ្រុប ដែលទើបបានបញ្ចប់កាលពីពេលថ្មីៗនេះបានឲ្យដឹងថា គិតត្រឹមត្រីមាសទី ៣ ឆ្នាំ២០១៤ នេះ តម្លៃដីនៅក្នុងរាជធានីភ្នំពេញ មានកំណើនក្នុងរង្វង់ ២០ ភាគរយ សម្រាប់ដីនៅតំបន់ពាណិជ្ជកម្ម និងដីលំនៅឋានកើនឡើងក្នុងរង្វង់ ៣០ ភាគរយ បើប្រៀបធៀបនឹងរយៈពេលដូចគ្នា កាលពីឆ្នាំ ២០១៣។ ខណ្ឌនៅកណ្តាលក្រុងចំនួន ៤ គឺ ខណ្ឌចំការមន ខណ្ឌដូនពេញ ខណ្ឌ៧មករា និងខណ្ឌទួលគោក តម្លៃដីបានហក់ឡើងខ្ពស់ជាងគេ។
ការសិក្សាខាងលើបានរកឃើញថា ខណ្ឌចំការមន ជាខណ្ឌដែលនៅតែលេចធ្លោជាងគេ ដោយសារសង្កាត់មួយក្នុងខណ្ឌនេះ គឺសង្កាត់ ទន្លេបាសាក់ មានគម្រោងសាងសង់ធំៗ ជាច្រើនកំពុងដំណើរការដូចជា The Bridge, Casa Meridian, Diamond One, និង Riviera ជាដើម ដោយដីនៅទីនោះមានតម្លៃជាមធ្យមចាប់ពី ៤០០០-៦០០០ ដុល្លារក្នុង ១ ម៉ែត្រការ៉េ សម្រាប់ដីពាណិជ្ជកម្ម និងដីលំនៅឋានមានតម្លៃចាប់ពី ២០០០-២៥០០ ដុល្លារក្នុងមួយម៉ែត្រការ៉េ។
ចំណែកតម្លៃដីនៅតាមបណ្តោយមហាវិថីព្រះសីហនុ ម្តុំអគារ Gold Tower 42 រហូតដល់វិមានឯករាជ្យ បានកើនរហូតដល់ ៨០០០ ទៅ ៩០០០ ដុល្លារក្នុងមួយម៉ែត្រការ៉េ និងដីសម្រាប់ពាណិជ្ជកម្ម មានកំណើនក្នុងរង្វង់ពី ១០-១៥ ភាគរយក្នុងត្រីមាសទី ៣ បើប្រៀបធៀបនឹងត្រីមាសទី ២ ឆ្នាំដដែលនេះ។
របាយការណ៍នោះបានឲ្យដឹងទៀតថា ដោយសារមានតម្រូវការដីនៅក្នុងខណ្ឌ ចំការមន ច្រើនទើប បច្ចុប្បន្នអ្នកវិនិយោគពិបាករកដីធំៗណាស់នៅទីនោះ។
ចំណែកតម្លៃដីក្នុងខណ្ឌដូនពេញ ក៏មានកំណើនខ្ពស់ផងដែរ ដោយបច្ចុប្បន្ននេះ ដីសម្រាប់តំបន់លំនៅឋានមានតម្លៃចាប់ពី ៣៥០០-៤០០០ ដុល្លារ ដីតំបន់ពាណិជ្ជកម្មមានតម្លៃចាប់ពី ៥០០០ ទៅ ៧៥០០ ដុល្លារក្នុងមួយម៉ែត្រការ៉េ។ បើគិតចាប់ពីស្តុបវិមាន កាណាឌីយ៉ា ទៅដល់ភ្លើងអគារ Gold Tower 42 តាមបណ្តោយមហាវិថីព្រះមុនីវង្ស ដីទីនោះភាគច្រើនគឺជាផ្ទះហាង។ តំបន់ក្នុងខណ្ឌដូនពេញ ក៏មានសក្តានុពលសម្រាប់ការវិនិយោគផ្នែកសណ្ឋាគារផងដែរ។
តម្លៃអចលនទ្រព្យក្នុងខណ្ឌ ៧មករា ក៏មានការហក់ឡើងខ្ពស់ក្នុងរង្វង់ពី ១០ ទៅ ១៥ ភាគរយផងដែរនៅក្នុងត្រីមាសទី ៣ កន្លងមក ព្រោះនៅក្នុងតំបន់នោះមានគម្រោងសាងសង់អគារពាណិជ្ជកម្មច្រើន ពិសេសការសាងសង់គម្រោងអាផាតមិន និងសណ្ឋាគារ នៅក្នុងសង្កាត់បឹងព្រលឹត និងសង្កាត់អូឡាំពិក ដូចជាអគារ Phnom Penh Tower, Olympia City ផ្សារទំនើប City Mall និងផ្សារអូរឫស្សី ជាដើម។
បច្ចុប្បន្ននេះគម្រោង Olympia City បានជួយលើកស្ទួយមុខមាត់តំបន់នេះយ៉ាងខ្លាំង ពិសេសតម្លៃអចលនទ្រព្យនៅតាមផ្លូវ ១៦៣ បានលោតឡើងយ៉ាងខ្ពស់ ដែលបានធ្វើឲ្យតម្លៃដីនៅតំបន់នោះកើនឡើងដល់ចន្លោះពី ៦០០០ ទៅ ៨០០០ ដុល្លារក្នុងមួយម៉ែត្រការ៉េ។ តែទោះបីជាយ៉ាងណា បើគិតជាមធ្យមតម្លៃដីលំនៅឋានក្នុងខណ្ឌ ៧មករា មានតម្លៃចាប់ពី ៣០០០-៣៦០០ ដុល្លារ និងដីពាណិជ្ជកម្ម មានតម្លៃចាប់ពី ៥០០០ ទៅ ៦៣០០ ដុល្លារក្នុងមួយម៉ែត្រការ៉េ។
បើងាកមកមើលតំបន់ទួលគោកវិញ ការសិក្សាដដែលបានរកឃើញថា តម្លៃដីសម្រាប់លំនៅឋាននៅក្នុងខណ្ឌ ទួលគោក មានចន្លោះពី ១៦០០ ដល់ ២០០០ ដុល្លារ និងដីពាណិជ្ជកម្មមានតម្លៃចាប់ពី ៣៨០០-៤៩០០ ដុល្លារក្នុងមួយម៉ែត្រការ៉េ។
ខណ្ឌទួលគោក មានសក្តានុពលច្រើនផងដែរ ដោយបច្ចុប្បន្ន គេឃើញមានការសាងសង់សាកលវិទ្យាល័យ អាផាតមិន និងការពង្រីកសាខាធនាគារជាច្រើនទៅកាន់តំបន់នេះ។
លោក ហ៊ិន សុជាតិ ប្រធានផ្នែក ប៊ុណ្ណា អចលនទ្រព្យ នៃក្រុមហ៊ុន ប៊ុណ្ណា រៀលធី គ្រុប បាននិយាយថា តម្លៃដីនៅរាជធានីភ្នំពេញបានហក់ឡើងខ្ពស់ក្នុងត្រីមាសទី ៣ ឆ្នាំ២០១៤។ មូលហេតុសំខាន់នៃកំណើនតម្លៃដីធ្លីនេះ គឺដោយសារមានកត្តាមួយចំនួនដូចជា ទី១អតិថិជនមានចំណេះដឹងប្រសើរជាងមុនពេលមានវិបត្តិសេដ្ឋកិច្ច ដោយការទិញ លក់របស់ពួកគេនៅពេលនេះមានកម្មវត្ថុច្បាស់លាស់ ទី២ ស្ថិរភាពនយោបាយ និងកំណើនសេដ្ឋកិច្ចប្រកបដោយទំនុកចិត្ត ទី៣ ការហូរចូលនៃអ្នកវិនិយោគមកពីក្រៅប្រទេស និង ទី៤ ការដែលកម្ពុជាត្រៀមខ្លួនធ្វើសមាហរណកម្មសេដ្ឋកិច្ចជាមួយបណ្តាប្រទេសនានានៅក្នុងតំបន់អាស៊ាន នាចុងឆ្នាំ២០១៥។
លោកបានថ្លែងថា៖ «បើគិតតែខណ្ឌចំនួន៤នៅកណ្តាលរាជធានីភ្នំពេញតម្លៃដីបានហក់ឡើងខ្ពស់ជិតទ្វេដង បើប្រៀបធៀបទៅនឹងមុនពេលមានវិបត្តិសេដ្ឋកិច្ចឆ្នាំ ២០០៨ តែបើគិតទូទាំងរាជធានីភ្នំពេញតែម្តង គឺនៅមានកម្រិតទាបជាងឆ្នាំ ២០០៨ ដោយសារតែការពង្រីកទីក្រុង និងការបំបែកខណ្ឌកាន់តែច្រើន»។
លោកបានបន្តថា៖ «មុនឆ្នាំ ២០០៨ តម្លៃដីខ្ពស់បំផុតនៅក្នុងខណ្ឌចំការមន មានចាប់ពី ៤០០០-៥០០០ ដុល្លា តែបច្ចុប្បន្នតម្លៃដីនៅតំបន់ខាងលើបានហក់ឡើងដល់ ៨០០០ ទៅ ៩០០០ ដុល្លារក្នុងមួយម៉ែត្រការ៉េ»។
លោកបានឲ្យដឹងថា តម្លៃអចលនទ្រព្យនៅកម្ពុជានៅតែមានសញ្ញាល្អសម្រាប់ការវិនិយោគ និងនៅតែផ្តល់ប្រាក់ចំណេញត្រឡប់ (Return Of Investment) ពីការវិនិយោគខ្ពស់ជាងបណ្តាប្រទេសអាស៊ានដទៃទៀត។
លោកបានលើកឧទាហរណ៍ថា៖ «បើទិញខុនដូប្រណីត ដូចគ្នារវាងភ្នំពេញ និងនៅ សិង្ហបុរី គឺមានតម្លៃខុសគ្នាច្រើនដោយនៅសិង្ហបុរីអាចមានតម្លៃជាង ២០០០០ ដុល្លារក្នុងមួយម៉ែត្រការ៉េ តែនៅកម្ពុជាមានតម្លៃខ្ពស់បំផុតត្រឹម ៣០០០ ដុល្លារប៉ុណ្ណោះ។ អ៊ីចឹងបើវិនិយោគនៅសិង្ហបុរី អ្នកវិនិយោគទទួលបានផ្ទះទំហំតូច តែទិញនៅកម្ពុជាបានផ្ទះទំហំធំ និងបានទទួលផលចំណេញខ្ពស់ថែមទៀតផង»។
លោក គីម ហ៊ាង នាយកក្រុមហ៊ុនអចលនទ្រព្យខ្មែរ បានយល់ស្របនឹងការសិក្សានេះ ព្រមទាំងបានចាត់ទុកឆ្នាំ ២០១៤ ជា «ឆ្នាំមាសឆ្នាំប្រាក់របស់អ្នករកស៊ីដីធ្លី និងជាឆ្នាំជោគជ័យរបស់អ្នករកស៊ីវិស័យអចលនទ្រព្យនៅកម្ពុជា» ព្រោះនារយៈពេលបីខែចុងក្រោយនេះតម្លៃអចលនទ្រព្យបានហក់ឡើងខ្ពស់មែនទែនដែលធ្វើឲ្យអ្នករកស៊ីដីធ្លីបានចំណេញប្រាក់ជាច្រើន។ រីឯ អ្នកមានដីធ្លីសម្រាប់លក់ក៏ទទួលបានប្រាក់ច្រើនផងដែរ។
លោកបន្តថា តម្លៃដីធ្លីខ្ពស់ជាងគេមាននៅជុំវិញផ្សារធំថ្មីដែលមានតម្លៃចាប់ពី ៨០០០-៩០០០ ដុល្លារក្នុងមួយម៉ែត្រការ៉េ និងបន្ទាប់មកដីនៅជួរមាត់ទន្លេដែលមានតម្លៃប្រហាក់ប្រហែលគ្នានេះ ព្រោះផ្ទះមួយល្វែងមានតម្លៃរហូតដល់ ១ លានដុល្លារ ឬច្រើនជាងនេះ។ បន្ទាប់ពីទីតាំងទាំងពីរខាងលើ គឺផ្ទះ និងដីនៅជុំវិញផ្សារអូឡាំពិក និងបន្ទាប់មកដីនិងផ្ទះនៅម្តុំផ្សារ ឡាក់គី តាមបណ្តោយមហាវិថី ព្រះសីហនុ ផ្ទះមួយល្វែងមានតម្លៃចាប់ពី ៨០ ម៉ឺនដល់ជិត ១ លានដុល្លារ ហើយបើគិតជាតម្លៃដីមានតម្លៃចាប់ពី ៧០០០-៨០០០ ដុល្លារក្នុងមួយម៉ែត្រការ៉េ។
លោក គីម ហ៊ាង មានប្រសាសន៍ថា៖«បើប្រៀបធៀបនឹងឆ្នាំ ២០០៨ កន្លងមក តម្លៃដីធ្លីនៅរាជធានីភ្នំពេញបានកើនតម្លៃខ្ពស់ជាង តែកំណើននេះមិនទាន់ដល់កម្រិតទ្វេដងនោះទេ តែបើនិយាយពីតម្លៃជាក់ស្តែងពិតជាមានខ្ពស់ជាងនិងអាចលក់បានទៀតផង»៕